मुक्तक–एक
छिट्टै फर्की आफ्नै देशमा आउनू है
चट्ट काली लगाई केशमा आउनू है
पर्खी बसेकी छु बाटो हेरेर तिम्रै
लिन छिटो बेहुलाको भेषमा आउनू है ?
मुक्तक–दुई
सन्तान परदेशमा बाआमा रुँदै होलान्
कहिले आउँछन् भनी बाटो हेर्दै होलान्
कति दशैँ आएर जान्छ प्रदेशलाई थाहा हुन्न
घरमा बाआमा आँसुले आँखा धुँदै होलान् ।
मुक्तक–तीन
दशैँ आ’को बेला दशा नबनोस् यो साल
सबैसबैको उन्नति प्रगति होस् यो साल
घरघरमा सुख शान्ति समृद्धिले छाओस्
परदेशीले चाहेको हर कुरा पुगोस् यो साल ।
मुक्तक–चार
किन मेरा रहर सधैँ यसरी टुट्ने भए दिदी
अब पनि आँखामा मूल फुट्ने भए दिदी
जहिल्यै आउँछु भन्ने कहिल्यै आउनुहुन्न
सधैँ यसैगरी धेरैवटा दशैँ छुट्ने भए दिदी ।
०००
ओखलढुङ्गा