मुक्तक–एक
मेरै वरिपरि घुम्ने बनाउँछु नसोचे नि हुन्छ
मन र मस्तिष्कमा छाउँछु नसोचे नि हुन्छ
युगौँयुग तपस्यापछिको अन्तिम प्राप्ति हुँ,
मुखुण्डो लगाउनेले पाउँछु नसोचे नि हुन्छ ।
मुक्तक–दुई
हेर्दा देखिए तापनि सबै एकताजस्तो
नहुने रहेछ कसैको प्रेम ममताजस्तो
बदलिरहने सरकारझैँ रहेछ तिम्रो मन,
बदलिएन मेरो मन भक्त जनताजस्तो ।
मुक्तक–तीन
ठूला होस् या होस् भुरा पैसाले किन्छु
पूरा भएजति रहर अँधुरा पैसाले किन्छु
प्रेम रोपेर प्रेम नफल्ने यो बञ्जर शहरमा,
अब जति छन् बाँकी कुरा पैसाले किन्छ ।
मुक्तक–चार
हाम्रो जरुरत सफरमा मात्र आउँछ सोचिएन
यथार्थमा नभई रहरमा मात्र आउँछ सोचिएन
हिजो सँगै लडियो जुन परिवर्तनको लागि,
परिवर्तन हजुरको घरमा मात्र आउँछ सोचिएन ।
मुक्तक–पाँच
झरेको फूल टिपेर लगाऊ पनि भन्दिनँ
घरको छानो हुरीलाई बचाऊ पनि भन्दिनँ
मौरीले जसरी घार त्यागेर जाने नै भए,
एक्लो हुन्छु छोडेर नजाऊ पनि भन्दिनँ ।
मुक्तक–छ
नबदलिएको भए तिमी कुनै पलजस्तै
आउँथ्यो होला खुशीहरू बादलजस्तै
सायद जिन्दगी सार्थक हुन्थ्यो यतिबेला,
तिमीले प्रेम पनि गरेको भए छलजस्तै ।
०००
खोटाङ