थबाङ गाउँपालिकाले स्थानीय पाठ्यक्रममा आधारित रहेर ‘मगर खाम भाषा’को पाठ्यपुस्तक तयार गर्न प्रारम्भिक प्रक्रिया अघि बढाएको छ । थबाङ गाउँपालिकाको शिक्षा, युवा तथा खेलकुद शाखाले एक कार्यक्रम आयोजना गरी ‘मगर खाम भाषा’को पाठ्यपुस्तक तयार गर्न प्रारम्भिक प्रक्रियाका लागि मस्यौदा लेखन कार्यदल गठन गरेको छ ।
वीर बलभद्र मावि थबाङका विव्यस अध्यक्ष अजय घर्तीमगर, भानुभक्त मावि उवाका विव्यस अध्यक्ष डुकमन रोकामगर, हिमालय फूलबारी मावि मिरुलका विव्यस अध्यक्ष भीमबहादुर रोकामगर र हिमालय प्रावि उवाका प्रधानाध्यापक जीतपुरा पुनमगरको आतिथ्यता रहेको बैठकले उदय घर्तीमगरको संयोजकत्वमा ६ सदस्यीय पुस्तक मस्यौदा लेखन कार्यदल गठन गरेको छ । कार्यदलमा धनबहादुर रोकामगर, प्रेमप्रकाश घर्तीमगर, बोमबहादुर घर्तीमगर, बेलबहादुर बुढामगर र बालिका बुढामगर सदस्य रहनुभएको छ ।
कार्यदलले आगामी २०८० फागुन १५ गतेभित्र पुस्तकको मस्यौदा तयार गरी शिक्षा, युवा तथा खेलकुद शाखामा पेस गर्ने¸ विज्ञ तथा शैक्षिक सरोकारवालाहरूबाट थप रायप्रतिक्रिया लिई पुस्तकलाई अन्तिम रूप दिनेछ । पुस्तक तयार भएपछि आगामी शैक्षिक वर्ष २०८१ देखि थबाङ गाउँपालिकाअन्तर्गतका विद्यालयहरूमा कक्षा १¸ २ र ३ मा मगर खाम भाषाको नयाँ पाठ्यपुस्तक पठनपाठन हुनेछ ।
कार्यदलले मगर खामभाषी लेखकहरूबाट कक्षा १¸ २ र ३ मा उपयुक्त हुने मगर खाम भाषाका लेखरचनाहरू माग गर्नेछ । त्यसका लागि इमेल ठेगानासहित २०८० माघ १४ गते साँझसम्म विधागत रूपमा कार्यदलले थोरै र गुणात्मक लेखरचनाहरूको आह्वान गर्ने तयारी थालेको बताइएको छ ।