मासन,
कतानी नहुओ ता
नाम्क स्यान्य मीन त ङाङाक
खेउ क्वाइसिदे,पेताङ्ङे पोसिदे
ह्वाङ ल खोर्चो सुर्सिदे,ङै त चेमे जासिदे
सोइओ सोइओ र्या छप छप लिरिज्या
झिम्करी झिम् झिम् …झिम्करी झिम् झिम्
थैज्याउ गा: स !
खुगुप थोरनी चिभैज्याउ ङामि रङ्दे नउ गा मीँए
ङालै होपाइनाज बाजा जैसङ्कु
ङामोसिया हैलिदे ढोङ्ओ ओमादैदे खार्ल
तोबो गा:ए केउन्सङ्कु ‘गोघोल्या भान्जी’
छ्यासए ओपो रादे युङ
ङामासन्य ङा कतानी उहुओ ता घोर्सिन्य
‘गोघोल्या मामा’
ङाछ्यास रेङ्दे नाम्क स्याके ङालै तान्दे
सोङ छा सोङ रि
राम ओखेम्ओ छ्यामका माराम छ्याम
घर्य घर्य ओल्केर खङ-र
बादे बादे मनि जिम माकेन्य यम सिदे
हुर्सि हुर्सि माङम्सिउ केउसिसु कुई-र
हुर हुर ङम्सिउ अछतङ्ङ केनाउ रासिसु युङ-र
खर्क चि दैसिकेर छाङ्सिउ रेङ-र
तपिलाङतज
अैज केहुन्के बुरु घिवासङ्करा
ङामिन ता घिउलै नेभा जैदे
तभायाज ङागाल्के नमिन त तभा नैदे
उछाति छापउन्के ङापोन्तेली तर्क/ढुङ्क
मोदे दुप्दे ङानैय नमिनतज
तपिलाङतज
अैज केहुन्के बुरु बारभदौ
नपुरस दुप्न्य नकैओ भाक्वै स्याकरी शनि
पित्तर सक नख्याक नमङ नि तेप्ओ सक ओन्य
ङामङ मनि मङयाज ताके
बुरु नउ चङ्घैरा ता पेङ्ङो स
हुर्लैसिदे ङादे झिन्दे ङाह्वाईयाज हुक्के
ङाह्वाईक मनि नपलिया हैलिदे नङ
छेय छेय ङाचुसिके भ्या छकाल्न्य
रि-ल ङास्याक मनि नपच्चिसिया हैलिदे नङ
बनै छेय छेय ङाङल्के भ्या रि
छ्याए जुङ-ल भ्या ङाछेके
ङाछुसन्क मनि नङ नहुर्या हैलिदे
गिनलै तोबो त पोओ माधुन्य नम घुर्दे
मिनी वाओ नमोनम-ल
छि ङाखिम्नाक छिम्सि छिम्सि गिओ तादे ङाओल्य
गिनलै सिम्दे तोबो बङ-ल थुओ माधुन्य राङ्ङे घुर्दे
गिनरासिउ छ्याम-र स्याउका रासिउ
सला ङासिम्नाक युदे युदे बोमोजा तादे ङाओल्य
मापलिय आल्ला-आछिम रातै-स
ङायुङला बह घुर्दे गा:
मापाङ्देज चि हुर बुरु मिनी सुनमासुन
मोसि मोसि ङार्सुचन्य खुगुप-ल
नउ हतासाए चै केन्ओ ओयरा झाउन्न्य नकुई-र
कितौ सा-ए बोमोजा जैउन्ओ
गिओ चोला स्याउका रातै
होकाई हेसिदे हेसिदे नङसका खेम्ओ छ्याम-र
खेम्र रातै ढुङलज
कताए आर्गाल्ओ फलक फलक छ्यामरालै
करौ सैर ओइ-र
करौ रङ्ओ माधुओ नउ मिए ओइ ओइओ
माघ्यासङ्करा त गेजिमए जासिके
नाङ्खारे-र यासे:य झोम्पल्यानी
जासिके ङाचाँनी-ए मनि
चसिके होत्तज त्हील-य छालबोल
रोत्ता ताक्कुरा त
पार मि-र लामुई यामि-ए
कोथ्याली आप्केर ङापोन्तेली त
सुचन्दे नकर-त सुभुर्दे सधोङ्दे नलाङसङ्क
जामजामा छेदे जामजामा रेङ्दे
बनै झासिदे नङा नङा नजिम बाओ ङाम्दैदेज
नङ चि नबाओ ङाथैके
नङा-ल बान्य ङा नझिन् नझिन् बान्य ङाखङ माभन्य
छपक चुसिन्य ङामी माभन्य
ङाल्योक नख्यानैओ तभा नङ-स चत: नफ्यासिक
नयुङ खा हुर्खो थै थै
नमी चि खा घर्खो थै थै
आबो इतौ गोघोल्या मारैसिन्य चि मामा !
आबो इतौ नाम्क मनि मास्यान्य चि मामा !!
ङाफारिज्याक इतौ इतौज
फरि कताका हुदेले ङाङाक हैदान्य ‘गोघोल्या भान्जी’
ङा चि कैङालिके मामा
तोबो नङलै ङाघोन-ल केउदे
कैजैदे हैङादुके नउलै ‘गोघोल्या’ !
०००
मगर भाषा कविता : गोघोल्या
