गजल–एक
जीवनमा आउनेहरू पनि आउँछ जान्छ
एकछिन हसाँउछ, फेरि रुवाउँछ जान्छ ।
चाहिने बेला रहेछ नम्र भएर मिठो बोल्ने
अरूबेला त तितो वचन लगाउँछ जान्छ ।
बाठो भएर दिमाग चलाउन न जान्नेहरू
उल्टै बनाएको संरचना भत्काउँछ जान्छ ।
साँचो प्रमी हुन जीवन बिताउन खोज्नेहरू
स्वार्थ पूरा गर्नेहरू त रात बिताउँछ जान्छ ।
परदेश गएको छोरो बाकसमा फर्किएपछि
घर परिवार नै शोकाकुल बनाउँछ जान्छ ।
०००
गजल–दुई
भगवान् अर्को जन्म मलाई लिन नपरोस्
लिए भने पनि छोरी भएर जन्मिन नपरोस् ।
माटोमा मिलोस् बरु ज्यान बनोस् खरानी
पलपल मैनबत्तीझैँ जलेर सकिन नपरोस् ।
मृत्यु एक्कासी आओस् लैजान मलाई
दिनरात दुःख र पीडामा तड्पिन नपरोस् ।
मैले हरबार यस्तो कामना गर्छु प्राथना गर्छु
मन दुखाउनेहरूलाई फेरि सम्झिन नपरोस् ।
विडम्बना बन्धनमा बाँधिएको वर्षदिन नपुग्दै
विधुवा बनेर सेतो कफनमा सजिन नपरोस् ।
०००
गजल–तीन
सबैले यस्तै भन्छन् आवश्यक छ
बाँच्न पनि त जीवन आवश्यक छ ।
चल्न सक्दैन एक अर्काविना
मुसँगै धड्कन आवश्यक छ ।
एकोहोरो प्रेम सफल हुनै सक्दैन प्रिय
प्रेम गर्नलाई दुई मन आवश्यक छ ।
तिमी धनभन्दा मन ठुलो भन्छौ
हेर¸ मनसँगै धन आवश्यक छ ।
जीवन सहज र सफल बनाउनलाई
बिछोडभन्दा मिलन आवश्यक छ ।
०००
गजल–चार
मनमा बिझ्ने तिखो वचन लगाएको भए
तिम्रो कुरामा सहमति मैले जनाएको भए ।
घमण्डी बनेर चिनिन्थेँ म पनि तिमीजस्तै
साँच्चै म हुनुको घमण्ड मैले देखाएको भए ।
कोलाहल मचिन्थ्यो, झगडा हुन्थ्यो फेरि
तिमी रिसाउँदा म पनि रिसाएको भए ।
पूरा गर्ने हिम्मत राख्ने थिएनँ फेरि मैले
सपनाको घर सपनामै भत्काएको भए ।
सुखी नभए पनि खुसी हुने थिएँ हरक्षण
जीवनको सहारा बनेर तिमी आएको भए ।
०००
गजल–पाँच
विछोडमा कोही अनि मिलनमा कोही
आउने जाने गरी नै रहे जीवनमा कोही ।
फक्रिएको फूल कतै चुडाउँछ कि भनेर
हिफाजत गरेर बसेको छ यो मनमा कोही ।
दुःख पर्दा फर्केर समेत हेरेनन् मलाई
यतिसम्म घमण्डी भए धनमा कोही ।
अहिले पनि त्यति नै प्यारो हुन सकेनँ
जति प्यारो थियो वचपनमा कोही ।
तन, मन, जीवनभरि अधिकार जमाएर
सास बनेर धड्किन्छ धड्कनमा कोही ।
०००
प्युठानकी लालीमाया थापामगरले यी गजलहरू ‘सहिदस्मृति साहित्य प्रतिष्ठान¸ रोल्पा’ले २०८० चैत्र २९ गते लिबाङमा आयोजना गरेको ‘रोल्पा गजल महफिल–२’मा वाचन गर्नुभएको थियो ।
कार्यक्रममा वाचन भएका अन्य गजलकारका गजलहरू
कपिलमणिका पाँच गजलहरू
कपिलमणिका पाँच गजलहरू
जि.एम. दीपु देपेन्द्रका पाँच गजलहरू
जि.एम. दीपु देपेन्द्रका पाँच गजलहरू
दिलकुमारी बुढामगरका पाँच गजलहरू
दिलकुमारी बुढामगरका पाँच गजलहरू